Kaha chitta taha

କାହା ଚିତ୍ତ ତାହା ଚାହିଁ ନ ବଳିବ ଯାହା ଦେଖିଲି ଗୋ ମା ଆହା ନବ ତାରୁଣ୍ୟ ଆହା ସେ କି ଲାବଣ୍ୟ ଆହା ବ୍ରଜେନ୍ଦ୍ର ପୁଣ୍ୟପୁଞ୍ଜ ଗୋଷ୍ଠଚନ୍ଦ୍ରମା

(ପଡ଼ି) ବଳାହକ ନିବହ କଳାରୁ ବଳି ଦେହ ଡୋଳାରେ ନାଚୁଛି ଗୋ ମା ଢଳାଚୂଳ ଧ୍ୱଜକୁ ଆହା କେକୀ ଚୂଳକୁ ବଳାଉ ଦୃଷ୍ଟି ସରିଗଲା ସବୁ ଗାରିମା

ନିଟିଳାଳକ ଅଧ କୁଟିଳ ଭୂରୁ ମଧ୍ୟ ପଟୀର ତିଳକ ଗୋ ମା ନଟୀ ରତ୍ନ କୁଣ୍ଡଳ ଘୋଟିଛି ଗଣ୍ଡସ୍ଥଳ କଟି ପୀତ ଦୁକୂଳ ହା ତ୍ରିଭଙ୍ଗ ଭଙ୍ଗିମା

ଖଞ୍ଜନଯୁଗ ମଦଗଞ୍ଜନ ନେତ୍ରଦ୍ୱନ୍ଦ କି ଅନୁରଞ୍ଜନ ଗୋ ମା କଞ୍ଜ ସଂଯୋଗ ଅଳି ପ୍ରଭଞ୍ଜନେ ଆନ୍ଦୋଳି ହେଲା ପରାଏ ଚଳି ମଣ୍ଡୁଛି ଶ୍ରୁତି ସୀମା

ଯୁବା ନିକର ବର ନବାବତାର ମାର କିବା ସେ ହୋଇଛି ଗୋ ମା ନିବାସ ମୁରଲୀର ଜୀବାତୁ ଯୁବତୀର ଜବା ଗର୍ବାପହର ଅଧର ଅରୁଣିମା

ଗୋପାଳକୃଷ୍ଣ ଭାଷେ ଅପାର ଦିନରୁ ସେ ଉପାୟ କଲେନି ଗୋ ମା ନପାଇ ଅବସର କୃପାମୟୀ ତୁମ୍ଭର ସ୍ୱରୂପ ହୋଇଲାନି ଶ୍ୟାମ ନେତ୍ର ପ୍ରତିମା