Priya sakhi karibi ki buddhi go

ପ୍ରିୟସଖି କରିବି କି ବୁଦ୍ଧି ଗୋ ଗଲିନି ମୁଁ ଲାଜେ ସଢ଼ି କେଉଁ ଗୁଣେ ରସି ନିକୁଞ୍ଜବିଳାସୀ ଅଛନ୍ତି ମୋ ଠାରେ ଜଡ଼ି

ମୁଁ ତ ଯଉବନ ମଦରେ ଗୁମାନ ମନ୍ଥର ଚାଲି ନ ଜାଣେ ମୋତେ ଜଳକେଳି ଅଳସୀ ମରାଳୀ ଗମନା ବୋଲନ୍ତି କେଣେ

ବ୍ରଜେ କେତେ ବାମା ନାହାନ୍ତି ସୁଷମା ସମ୍ଭାରେ ରମ୍ଭାରୁ ବଳି ସେ ଶିଖଣ୍ଡଚୂଳ ନୟନ ଅଞ୍ଚଳ ଆନେ ତ ନ କଲା କେଳି

ମୁଁ ଚାହିଁ ନ ଜାଣେ ଲବେ ନେତ୍ର କୋଣେ ନଚାଇ ଭୂରୁକୁ ଗେଲେ ତେବେ ପୀତପଟ ନଟ ଖଞ୍ଜରୀଟ ନୟନା ମୋ ନାମ ଦେଲେ

ମନ ଜାଣିବାକୁ ଯେଉଁ ଦିନ ଭଲେ ନ ମଜାଇ କଣ୍ଠ ଭୂଷା ବିଗୁଣ ନ ଘେନି ଦ୍ୱିଗୁଣ ସେ ଦିନ କରନ୍ତି ଶୋଭା ପ୍ରଶଂସା

ଏଥୁଁ ଅବା ଖେଦ ହେଉଛି କି ମୋଦ ନ ଜାଣନ୍ତି ଆନ ସଖୀ କ୍ଷିତିପତି ବୃନ୍ଦ ମୁକୁଟ ମୁକୁନ୍ଦ ଦେବ କେବଳ ମୋ ସାକ୍ଷୀ