Go rasanati krusna nama chhadi

ଗୋ ରସନାଟି କୃଷ୍ଣ ନାମ ଛାଡ଼ି ଆନେ ରସ ନା ଟି

ଅଟକି ନ ରହି ଅଳସରେ ରଟ ରଟ ଚଳ ବିଳାସରେ କୃଷ୍ଣ କେଶବ କେଶିକଂସଦଳନ ବଲ୍ଲବୀଜନ ବଲ୍ଲଭ ହରେ

ଉପଳ ଶାକର ରସଫେଣା ମଧୁ ମଧୁରସା ସରପଣା ସୁଧା ତାମରସ ନେତ୍ରା ରସବାସ ଏ ସବୁ ଶ୍ୟାମ ନାମରୁ ଊଣା

ମକରନ୍ଦ ପକ୍ୱ ଚୂତ ରସ ପ୍ରବାହେ ନ ରଖ ତୁ ତରସ ବିଲକ୍ଷଣ ହରିନାମଙ୍କ ମାଧୁରୀ ଇତର ସକଳ ଗତରସ

ବୃନ୍ଦାବନ ବ୍ୟୋମ କଳାକର ବିରାଜ ଧ୍ୱଜ ହେ ବିଶ୍ୱମ୍ଭର ଅଜ ବାସୁଦେବ ମୁକୁନ୍ଦ ମାଧବ ଗୋବିନ୍ଦ ବୋଲି କୀର୍ତ୍ତନ କର

ଖଣ୍ଡ ମରିଚ କର୍ପୂର ଚୂରି ଦେଲେହେଁ ସୁରଭୀ କ୍ଷୀରେ ଭରି ଶ୍ୟାମ ରମଣୀୟ ମୋହନ ବିଗ୍ରହ ନାମର କଳାକୁ ନୋହେ ସରି

ବୋଲ ବୋଲ କଂସ ନିସୂଦନ ଜୟ ଜୟ ଦେବ ଜନାର୍ଦ୍ଦନ ଅଷ୍ଟଦୁର୍ଗ ପତି କହିବା ଭାରତୀ ଇଷ୍ଟ ସୁଧାରସ ପରି ଘେନ