Jamuna jiba nohila mita
ଯମୁନା ଯିବା ନୋହିଲା ମିତ
Text
Ghoṣā
ଯମୁନା ଯିବା ନୋହିଲା ମିତ ବାଟେ ଜଗି ବସିଅଛି ନନ୍ଦସୁତ ସେହି କଳା ଭୂତ
1
ସେ ପୀତପଟିଆ ପଥେ କରି ଠିଆ ବୋଲୁଥାନ୍ତି ବାଣୀ ଆଚମ୍ବିତ କରି ବଂଶୀ ସ୍ୱନ ମୋହି ଆମ୍ଭ ମନ ଚିତ୍ତକୁ କରନ୍ତି ବିହ୍ୱଳିତ
2
କି ମନ୍ତ୍ର ପଢ଼ାଇ ନିଅନ୍ତି କଢ଼ାଇ ନ ରହଇ ଆମ୍ଭର ଆୟତ୍ତ ଯମୁନା କୂଳରେ କୌତୁକ ମୂଳରେ ବସାଇ ନିଅନ୍ତି ହୁରୁମତ
3
ଜଳରେ ପୂରାଇ କୌତୁକ ଭିଆଇ ବସ୍ତ୍ର ହରି କଲେ ହରକତ ବୋଲନ୍ତି ଜଳରେ ଉଲଗ୍ନ ହୋଇଲ କର ଯୋଡ଼ି କର ଦଣ୍ଡବତ
4
କେ ବୋଲେ ଗୋ ସହି ଜଳ ନେବା ପାଇଁ ଯମୁନା ଘାଟ ହେଲା ଦୁର୍ଘଟ ହୋଇଲେ ବାହାର ଚିତ୍ତ ଥରହର ଥିବେ ଚିତ୍ତଚୋରା ଡକାୟତ
5
ଜଳରୁ ବାହାରି ଯେଝା ବସ୍ତ୍ର ଧରି ପିନ୍ଧି ଫେରି ଅଇଲେ ତୁରିତ ବୋଲେ ବନମାଳୀ ଆଗୋ ବ୍ରଜବାଳୀ କୃଷ୍ଣ ଚରଣେ ରଖିଥା ଚିତ୍ତ